Grefillinn

Seldist ekki neitt 

„Gríðarleg vonbrigði“, segir Hannes Hólmar. 

Bestu blogg Hannesar: Seldist ekki neitt fyrir jólin.

„Já, auðvitað eru það gríðarleg vonbrigði að hafa ekki selt eitt einasta eintak af bókinni, ég neita því ekki“, segir Hannes Hólmar Gestsson, en hann skipar þann vafasama sess að vera eini rithöfundurinn um þessi jól sem seldi enga bók.

Hver heldur þú að ástæðan sé fyrir þessari dræmu sölu?

„Það er erfitt að segja og gætu verið margar samtvinnaðar ástæður. Kannski er fólk bara búið að fá nóg af spennusögum og sækir frekar í eitthvað léttmeti eins og matreiðslubækur og gamanmál. Ef til vill var bókinni ekki rétt stillt út á söluborðum og svo má líka geta sér til um að hún hafi ekki verið rétt auglýst. Hver veit?“

Ætlarðu að skrifa aðra bók?

„Ég veit það ekki“, segir Hannes. „Það fóru fimm ár í að skrifa þessa bók og árangurinn er ekki beint sú hvatning sem ég þurfti. En auðvitað á maður aldrei að segja aldrei. Það koma jól eftir þessi jól.“

Þess má geta að sú bók sem seldist næstminnst um þessi jól var bókin Barátta mín, eftir Vigdísi Hauksdóttur alþingismann, en hún fór í átta eintökum.

• Share