Nov 292013
 

96 starfsmönnum sparkað

„Alveg að drepast í rassgatinu“, segir Óþverri Árnason.

Stöð 2 var á staðnum og náði þessari mynd af því þegar Óþverra var sparkað.

Stöð 2 var á staðnum og náði þessari mynd af því þegar Óþverra  Árnasyni var sparkað.

Grefillinn sparkaði í gær 96 starfsmönnum og ríkir mikil óánægja með hvernig það var gert. Einn þeirrra sem sparkað var er Óþverri Árnason sem um árabil hefur haft umsjón með pappírstætara fyrirtækisins.

Kom sparkið þér á óvart?

Já, ég get ekki sagt annað. Allt í einu var bara þrumað í rassgatið á mér þar sem ég var að smyrja tætarann og það næsta sem ég vissi var að ég sat bara úti á stétt.

Hvaða ástæða var gefin fyrir sparkinu?

Það var engin ástæða gefin. Bara spark í rassgatið.“

Ætlarðu að sækja rétt þinn?

„Nei, ég nenni því nú varla, alla vega ekki á meðan ég er að drepast í rassgatinu.“

Að sögn forstjóra Grefilsins er ástæðan fyrir spörkunum sú að starfsfólkið gerði ekki neitt. „Ég fór í frí í nokkra mánuði og svo þegar ég kem til baka kemur í ljós að starfsfólkið skrifaði ekki eina einustu frétt á meðan. Það segir sig sjálft að að það er ekki hægt að reka fjölmiðil þannig.“

Samkvæmt heimildum Grefilsins hyggst forstjórinn nú rífa miðilinn upp úr þeirri ládeyðu sem hann hefur verið í að undanförnu, en ekki er víst að það takist.

Nov 272013
 

„Átti ekki von á þessu“

segir Sjófinnur Bárðdal, lágstéttarmaður

Fyrsti jólasveinninn kominn til byggða. Athugðið að myndin tengist fréttinni ekki beint.

Fyrsti jólasveinninn kominn til byggða. Athugið að myndin tengist fréttinni beint.

Fyrsti jólasveinninn af 14, Niðurfellir, er kominn til byggða og byrjaður að guða á glugga landsmanna, rúmum hálfum mánuði á undan hinum jólasveinunum. Eitthver ruglingur virðist samt hafa orðið, því sá fyrsti sem fékk í skóinn frá honum að þessu sinni er lágstéttarmaður.

„Já, ég verð að viðurkenna að það kom mér á óvart í morgun að hafa fengið í gúmmískóinn frá Niðurfelli því hann hefur aldrei gefið mér neitt, sagði Sjófinnur Bárðdal, lágstéttarmaður, í samtali við Grefilinn í morgun. Það skrítna er að skórinn var ekki einu sinni út í glugga heldur bara á ganginum.” 

Hvað fékkstu í skóinn?

„Ég fékk eina niðurfellingu og hálfa leiðréttingu á skuld sem ég var reyndar búinn að borga.”

Ætlarðu ekki að skila niðurfellingunni?

„Jú, og hef þegar sent hana til félags millistéttarfólks sem ætlar að skipta henni á milli sín.”

Þess ber að geta að ekki er reiknað með að Niðurfellir nái að banka á alla millistéttarglugga fyrr en í næstu viku og er millistéttafólk beðið um að sýna honum fullan skilning.

Jul 032013
 

„Verður drepfyndin mynd”

segir Ryan Gosling sem leika mun aðalhlutverkið.

Ryan Gosling: Leikur Hall Magoo í nýrri mynd.

Ryan Gosling: Leikur Hall Magoo í nýrri mynd.

Íslenskt handrit eftir Láka Laufdal hefur slegið í gegn í Hollywood og hefur þegar verið ákveðið að fara af stað með framleiðslu myndar eftir því.

Myndin, sem heitir Messing With the Money, er byggð á raunverulegum atburðum og segir frá manni einum, Hall Magoo, sem í skjóli embættis síns og aðstoð pólitískra samherja fer létt með að setja hússjóð heillrar þjóðar á hliðina með algjörum bjánaskap og sprenghlægilegum ákvörðunum sem aðeins eru teknar þar sem menn maka krókinn og allt opinbert eftirlit er í molum.

Eftir að hússjóðurinn er kominn í klósettið nokkrum árum síðar ásamt þrjú hundruð milljörðum af almannafé tekur þó steininn úr þegar Hall fer í mál við skýrsluna sem gerð er um málið, en það er einmitt sá kafli sögunnar sem þykir hvað fyndnastur.

Að sögn Ryans Gosling, sem þegar hefur verið ráðinn til að leika Hall Magoo og er hér á landi til að kynna sér sögusviðið, segist hann aldrei hafa lesið jafnfyndna sögu, „sem verður enn hlægilegri þegar haft er í huga að hún er sönn”, sagði hann í stuttu samtali við Grefilinn í morgun.

Jul 022013
 

Halda uppi málþófi gegn málþófinu

Hætta ekki fyrr en forsetinn er farinn aftur.

MálþófÞingvopn stjórnarandstöðunnar um að halda uppi málþófi gegn veiðigjaldafrumvarpinu þar til forsetinn er kominn til landsins hefur nú snúist í höndum þeirra eftir að stjórnarliðar ákváðu að halda uppi málþófi gegn málþófinu þar til forsetinn er farinn aftur.

„Já, það er rétt”, sagði stjórnarliði sem vildi ekki láta nafns síns getið í viðtali við Grefilinn, „við munum halda uppi málþófi gegn málþófinu þar til forsetinn er farinn aftur og við fáum málskotsréttinn”.

„Ef þeir gera þetta þá einfaldlega höldum við uppi málþófi gegn málþófinu gegn málþófinu gegn veiðigjaldafrumvarpinu þar til forsetinn er kominn aftur og fer með málskotsréttinn”, sagði stjórnarandstæðingur sem vildi ekki heldur láta nafn síns getið.

„Ja, ef þeir gera það þá höldum við einfaldlega uppi málþófi gegn málþófinu gegn málþófinu gegn málþófinu gegn frumvarpinu þar til forsetinn fer í næstu ferð til útlanda”, sagði annar stjórnarliði sem vill ekki láta nafns síns getið.

„Geri þeir það þá munum við halda uppi málþófi gegn málþófinu gegn málþófinu gegn málþófinu gegn málþófinu gegn veiðigjaldafrumvarpinu þar til forsetinn er kominn til baka”, sagði annar stjórnarandstæðingur sem vill ekki láta nafns síns getið.

„Ef þeir beita því bragði þá munum við halda uppi málþófi gegn málþófinu gegn málþófinu gegn málþófinu gegn málþófinu gegn málþófinu gegn frumvarpinu þar til forsetinn hverfur úr landi á ný og við fáum málskotsréttinn”, sagði þriðji stjórnarliðinn sem vill ekki láta nafns síns getið.

„Við höfum að sjálfsögðu ráð við því”, sagði þriðji stjórnarandstæðingurinn sem ekki vill láta nafns síns getið. „Við höldum þá bara uppi málþófi gegn málþófinu gegn málþófinu gegn málþófinu gegn málþófinu gegn málþófinu gegn málþófinu gegn frumvarpinu þar til forsetinn skilar sér heim og fær málskotsréttinn”.

„Komi sú staða upp munum við halda uppi málþófi gegn málþófinu gegn málþófinu gegn málþófinu gegn málþófinu gegn málþófinu gegn málþófinu gegn málþófinu gegn frumvarpinu þar til forsetinn fer út á ný og við fáum málskotsréttinn”, sagði fjórði stjórnarandstæðingurinn sem vill ekki láta nafns síns getið.

„Fari svo þá munum við …”

Hér kláraðist blekið því miður úr penna blaðamanns Grefilsins, en við munum að sjálfsögðu færa lesendum okkar ítarlegar fréttir af málinu um leið og hann er búinn að fá nýja fyllingu.

Jul 012013
 

Breytti sér í hrossaflugu

Flaug grátandi út um gluggann.

Sigmundur Davíð, rétt áður en hann flaug út í garð.

Sigmundur Davíð, rétt áður en hann flaug út um gluggann.

Sigmundur Davíð Gunnlaugsson forsætisráðherra kom þingheimi og þjóð í opna skjöldu í morgun þegar hann breytti sér í hrossaflugu í miðri ræðu og flaug síðan grátandi út um gluggann. Samkvæmt heimildum Grefilsins eru afar skiptar skoðanir í þinginu á þessari hegðun Sigmundar og á meðan stjórnarliðar segja þetta sýna fram á hæfni Sigmundar til að bregðast við aðstæðum telja flestir stjórnarandstæðingar þetta vera kænskubragð í því skyni að draga athyglina frá aðalmálunum.

„Ég get vissulega tekið undir að þetta var snjallt hjá Sigmundi en tel hann einungis hafa gert þetta til að afla sér samúðar fjölmiðla”, sagði Össur Skarphéðinsson þingmaður aðspurður hvernig túlka bæri þetta óvænta útspil Sigmundar.

„Sigmundur Davíð sýnir með þessu hversu hæfur hann er að setja sig í spor lítilmagnans sem ætti um leið að sannfæra fólk um staðfestu hans, getu og heiðarleika gagnvart skuldavanda heimilanna og öðrum þeim vandamálum sem við er að etja í íslenskum stjórnmálum”, sagði hins vegar Sigurður Ingi Jóhannsson sjávarútvegsráðherra þegar Grefillinn innti hann eftir viðbrögðum.

Ekki hefur reynst unnt að ná tali af Sigmundi eftir að hann hvarf sjónum manna í Alþingisgarðinum og eru þeir fjölmiðlamenn sem verða hans varir vinsamlega beðnir að blaka ekki við honum.