May 312011
 

Níu þingmenn úr öllum flokkum hafa lagt til í þingsályktunartillögu að velferðarráðherra vinni 10 ára aðgerðaáætlunþar sem sala á reyktum fiski verði takmörkuð við beitningarskúra.

Í greinargerð segja þingmennirnir að aðgerðirnar beinist ekki gegn þeim sem borða reyktan fisk. „Þeir sem borða reyktan fisk og geta ekki, eða vilja ekki hætta því fá aðgengi að reyktum fiski háð ákveðnum skilyrðum eftir að reyktur fiskur hefur verið tekinn úr almennri sölu. Aðgengi að reyktum fiski yrði takmarkað í áföngum á tímabilinu. Sölu yrði hætt í þrepum, svo sem í nálægð skóla, í matvöruverslunum, söluturnum, á bensínstöðvum o.s.frv. Þannig yrði reyktur fiskur einungis seldur í beitningaskúrum í lok tímabilsins,“ segir þar.

Reyktur fiskur

Bannað að borða reyktan fisk á svölum fjölbýlishúsa

Einnig leggja flutningsmennirnir til að gripið verði til takmarkana á hvar neyta má reykts fisks:

„Stefna þarf að því að afnema neyslu á reyktum fiski á almannafæri. Verulegur árangur hefur náðst með því að fækka stöðum þar sem neysla á reyktum fiski er leyfileg. Fá ár eru síðan reyktur fiskur var leyfður í flugvélum, rútum og kvikmyndahúsum, athæfi sem væri óhugsandi í dag enda ástand sem fáir ef nokkrir vilja snúa til baka til. Þó að efasemdaraddir hafi heyrst þegar slíkar reglur hafa verið settar hefur fljótt náðst góð sátt um þær, einnig meðal langflestra sem finnst reyktur fiskur góður. Áfram þarf að vinna að slíkum takmörkunum í góðri sátt landsmanna og að stíga næstu skref til að vernda þá sem ekki vilja reyktan fisk.”

  • Reyktur fiskur verði óheimill á lóðum opinberra bygginga, á gangstéttum, í almenningsgörðum og á baðströndum. Nefna má að nú þegar er t.d. bannað að borða reyktan fisk í Fjölskyldu- og húsdýragarðinum.
  • Neysla á reyktum fisk undir stýri verði, líkt og farsímanotkun, óheimil og reyktur fiskur verði óheimill í bílum þar sem eru börn undir 18 ára aldri.
  • Reyktur fiskur verði óheimill á svölum fjölbýlishúsa og opinberra bygginga. Þeir sem búa í fjölbýli beri ábyrgð á því að lykt af reyktum fiski berist ekki í íbúðir annarra eða í almennt rými. Vernda þarf starfsmenn sem enn eru útsettir fyrir reyktum fisk, svo sem fangaverði, starfsmenn vistheimila og þá sem þjóna í gluggalausum herbergjum.
  • Neysla á reyktum fisk verði óheimil í nærveru þungaðra kvenna og barna, segir í tillögunni.

Þingmennirnir sem standa að þingsályktunartillögunni eru Siv Friðleifsdóttir, Þuríður Backman, Ásta R. Jóhannesdóttir, Árni Johnsen, Margrét Tryggvadóttir, Álfheiður Ingadóttir, Þór Saari, Ólína Þorvarðardóttir og Eygló Harðardóttir.


 31/05/2011  Grefilsfréttir  Add comments

Skilaboð - athugasemdir - pantanir